تورکيه‌ده محمد امین رسولزاده نین کيتابي يايينلاندي

images-shekler16-emn_resul-200x200سانانیوز: محمد امین رسولزاده نين 130-نجو دوغوم ايلدؤنومو خاطيره‌سينه حاضیرلانان بو کيتاب، 28 ماي ايستيقلال بايرامي موناسیبتی ایله نشر ائديلميشدير.
کيتابين اؤن سؤزونون مؤلليفي پروفسور جميل حسنلي دير. اؤن سؤزده، رسولزاده نين ياشاديغي سياسي موحيط و اونون فعاليتلري حاقيندا گئنيش بيلگي وئريلميشدير. کيتابين يازيلاريني سئچيب تورکيه تورکجه‌سينده چئويرن، تورکيه‌ده موهاجيرت حياتي ياشايان گونئي آذربايجانلي آراشديرماچي- يازار رامين جبارلي دير.
کيتاب، رسولزاده نين ايکي اؤنملي ريساله‌سي و 10 ديگر يازيسيندان عيبارتدير. بو کيتابدا رسولزاده نين داها چوخ سوسيولوژيک و فلسفي يازيلاري یئر آلیبدير. کيتابين آدي “ايختيلالچي سوسياليزمين ايفلاسي” و “دئموکراسينين گله جه یي” آدلي ايکي ريساله‌نين آدينين بيرلشديرمه‌سيدير. بو ايکي ريساله “ايختيلالچي سوسياليزمين ايفلاسي و دئموکراسينين گله‌جه یي” آدييلا 1928-نجي ايلده “ميللي آذربايجان نشرياتي”نين 8-جي ساييسيندا ايستانبولدا اورخانیه مطبعه سینده يايينلانميشدي.
“اولوسال دايانيشما” ،”ميللت اولماق عزمي” ،”ميللتچيليک- پاتريوتيسم” ،”اولوسال بيرليک” ،”يانليش تئريم قوللانماياليم” ،ميللت و قوم” ،”اولوسال اخلاق” ،”ايدئاليستلر، اوپورتونيستلر، بوزقونچولار” ،”دوغو ايسلام اويقارليغيندا آذربايجانين رولو” ،”بيبلييوگرافيا؛ ريجال آذربايجان در عصر مشروطيت” آدلي يازيلار ايسه کيتابدا يئر آلان ديگر يازيلاردير.
کيتاب ايستانبولدا دوغو نشرياتي طرفيندن يايينلانميشدير. (658)

facebooktwitter

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *